ម៉ាឡេស៊ី៖ ប្រទេសម៉ាឡេស៊ី បានរាយការណ៍ពីករណីកំណត់ត្រាអ្នកឆ្លងថ្មីច្រើនបំផុតរហូតដល់ ៦,០៧៥ ករណីនៅថ្ងៃពុធនេះ ខណៈប្រទេសនេះនៅតែបន្តរងគ្រោះដោយសាររលកទី៣ នៃការវាយប្រហារដោយវីរុសកូវីដ-១៩។

តាមសេចក្តីរាយការណ៍ពីក្រសួងសុខាភិបាលម៉ាឡេស៊ី ចំនួនលើស ៦ពាន់នាក់នេះ គឺជាកំណត់ត្រាថ្មីខ្ពស់បំផុតមិនធ្លាប់មាន ដោយតំបន់ដែលមានអ្នកឆ្លងច្រើនជាងគេគឺនៅរដ្ឋ Selangor មានអ្នកឆ្លង ២,២៥១នាក់ រដ្ឋ Johor មានចំនួន ៦៩៩នាក់ និងរាជធានីគូឡាឡាំពួរមានរបាយការណ៍អ្នកឆ្លងថ្មីចំនួន ៦៦០នាក់។ សូមបញ្ជាក់ថា កំណត់ត្រាអ្នកឆ្លងថ្មីខ្ពស់បំផុតនៅក្នុងប្រទេសម៉ាឡេស៊ីក្នុងមួយថ្ងៃមានត្រឹម ៥,៧២៨នាក់ប៉ុណ្ណោះ ដែលជារបាយការណ៍តាំងពីថ្ងៃទី៣០ ខែមករា ឆ្នាំ២០២១ កន្លងមក។

គិតត្រឹមថ្ងៃទី១៩ ខែឧសភានេះ មានសេចក្តីរាយការណ៍អ្នកឆ្លងកូវីដ-១៩ សរុបចំនួនជាង ៤៨ម៉ឺននាក់ និងព្យាបាលជាសះស្បើយមានជាង ៤៣ម៉ឺន ២ពាន់នាក់ និងចំនួនអ្នកស្លាប់ជិត ២ពាន់នាក់។ នេះបើយោងតាមគេហទំព័រ Worldometer៕